عن باميلا و د/فل و أوبرا وينفري و الناس اللي مايتسموش أتحدث!!!

لست من هواة الشات.......ولكن

عقلي قرب ينفجر, كل مآجي أعمل أب لود للصورة علشان أنزلها ف توقيعي على منتدى

أجنبي للمثل اليجاه وود(فرودو ف ملك الخواتم) تنزل لينك بس من غير ما تظهر الصورة

فقلت أطلب المساعدة من أي حد جوه المنتدى , وبعت رسالة فورية من بريد المنتدى لأحد

الموجودين بطريقة عشوائية لطلب المساعدة, وبعد شوية دقايق مرت عليا كالسنين كنت

بعيد محاولات رفع الصورة خلالها بلا فائدة....وصلنى رد قصير مفيد من باميلا وهي

(وده اللي عرفته بعد كده) بنت هولندية عندها 17 سنة,فحوى الرسالة كانت لنك لموقع رفع

للصور و قالتلى جربيه... و الحمد لله نفع و رفعت الصورة و حطيتها ف التوقيع و الحمد لله

و قلت أشكر البنية على المساعدة المهولة دي....

ملحوظة: طبعا انتم عمالين تقولوا و احنا مالنا بالليلة دي والموضوع من أصله

و أنا هرد عليكم و أقول ماتستعجلوش و اصبروا و كملوا قراية وانتم تعرفوا

أصل باميلا دي بقى كانت لطيفة و ودودة جدا معايا و ساعدتني(وده شئ نادر جدا بالنسبة للأوروبيين

المتحفظين و اللامبالين و الباردين غالبا) و بعتت رد على رسالة الشكر و قالتلى فيما معناه : لا شكر على واجب و لو عوزتي أي حاجة تانية أنا تحت أمرك...

المهم بعد كده لما ظبطت التوقيع وكتبت تحته كلمتين ايطالي كده لزوم الفشخرة يعني لقيت رسالة من باميلا

بتسألنب فيها ان كنت يعني (ولا مؤاخذة) ايطالية وطلبت الايميل بتاع الماسنجر عشان نتكلم شوية ايطالي

أصلها بتتعلم ايطالي و عايزة تمارس اللغة يعني...

المهم اديتها الايميل مكرهة بكرمي الحاتمي الشهير و بالجميل يتاعها , و اتكلمنا على الماسنجر ووضحتلها

اني مش ايطالية (لا قدر الله) بس بتكلم ايطالي لأني درسته بروفشنال في الكلية...

باميلا ما صدقتش ف البداية ان فيه كلية لتعليم اللغات الحديثة يعني يا ريت حتى اللغات المنقرضة أو الميتة

لمدة أربع سنين عشان الواحد يتعلم فيها لغة أو اتنين بالكتير و لمدة كبيرة يعنى أربع سنين بحالهم

و قالتلي أنا لسه ف الهاي سكول (الثانوية العامة عندنا) و بتكلم ...وراحت رصالي كذا لغة

و صلوا اخمس أو ست لغات...

طبعا بلعت كسفتي أنا اللي كنت كل أشوية أرطن بالايطالي و أقول يا أرض انهدي ماعليكي قدي

و كمان الانجليزي بتاعي مش ولا بد يعني و آل ايه كنت بفكر أروح أمثل ف هوليوود بالعنجليزي

بتاعي يا مرسي(هههههههه)..

المهم باميلا حبيبة قلبي سألتني(و بدأ الغيث ينهمر) وانتي بقى بتشتغلي ايه بالألسن دي؟؟

رديت عليها بعزة و شموخ: أنا ما بشتغلش ...(احم) أنا بدور على شغل لسه..

المهم بقى أنا قلت خير وسيلة للدفاع هي الهجوم و رميت الكورة ف ملعبها و سألتها:

انتي عايزة تطلعي ايه ؟؟

قالتلي: عايزة أبقى دكتورة نفساوية زي الدكتور فل كده تمام॥

و بعد المجاملات و عبارات الوداع وباي و تشاو وكده

قعدت أفكر...ياااه هو الهوة سحيقة كده, والمسافة بعيدة بينا و بينهم,

هما ف ناطحات السحاب و احنا جتى ماحصلناش البدروم......

أنا البنت المصرية اللي بتدور على حتى انها تكون مدرسة روضة بالألسن بتاعتها

و يا ريت حتى عارفة أوصل لكده...!!

و باميلا البنت الهولندية ذات ال17 عام اللي بتتكلم 5 لغات بطلاقة و اللي عايزة تبقى

زي الدكتور فل...بشهرته و نجاحه و ثروته....

احنا اللي أحلامنا بسيطة و صغيرة(و كمان مستكترينها علينا اللي مايتسموش)...

احنا اللي في ناس كتير فى بلدنا بتحلم برغيف العيش...

و هما أحلامهم كبيرة و عظيمة و غالبا بتتحقق...

لا أحقد على الغربيين بأمانة شديدة, لأنهم ناس بتشتغل و بتحقق أحلامها..

لكنى بحقد و بوجه شحنة الكراهية اللي جوايا من الزبالة و التلوث والفقر

و الجهل...و غيره للي بيذبحونا بالحاجات دي ...

العيب مش على السكينة العيب على اللى بيقتل بيها

الناس اللي ما يتسموش دول حاطين ف دماغهم انهم عملوا الللي

عليهم و زيادة ناحيتنا بدليل ان معدل الأعمار ارتفع ف مصر...

و ايه فايدة العمر الطويل في فقر و ذل و نكد أزلى(و كمان أذلي)

ده حتى أبسط حقوقنا مش لاقينها ( رغيف العيش)....يبقى عملتوا ايه يا بناة

نهضة مصر, اللهم لو كانت نهضة تعني في قواميس هؤلاء : وكسة أو عار!!

أنا بقى قررت اني أحلم , و أعيش حلمي ولو ف خيالى و بس...

أنا بقة عايزة أبقى زي.... أوبرا وينفري..

و ان شاالله ماحد حوش..

هناك 12 تعليقًا:

Empress appy يقول...

طيب والله انا بحب اوبرا موت ونفسى يتعمل فى مصر برنامج زيها وابقى قدميه يا ستى ان شاء الله ما حد حوش ههههههههههه
لا بجد الاحلام والطموح مش صعبه بس الصبر فى الوصول ليها لو ركزتى هتوصلى

نعكشة يقول...

هوه الفكرة انك متعتمديش علي التعليم الحكومي ولا المعونة الحكومية في تحقيق حلمك

وزي ما قالتلك آبي لو ركزتي هتوصلي

حقيقي
حطي ليكي حلم و ركزي علية
و اسعي لية بكل جهودك ( بعيداً عن مساعدات الحكومة) لإن هيجيلك شلل عقبال ما تعملي حاجة عن طريقها دة لو عملتيها
بس فية امل
وامل يعني مش بعيد انك تحققي اللي انتي عايزاة لو انتي عايزاة

و الوسائل كتيرة في مصر

خدي كورسات
دعبسي عالنت عالحاجات اللي انتي عايزاها
شوفي لو حد لية في مجال التلفوز خصوصا الفضائيات
شوفي حد يفيدك ف يالبرامج
السعي
و الجهد
وا لصبر
والعمل الدؤووب مبيروحش هدر
حقيقي مبيروحش هدر
من حقك تحلمي
وان شاء الله تحققي حلمك
و لو محققتيهوش كفاية شرف انك سعيتي
و هتتردلك حسنات يوم القيامة

يلا عايزين نشوف مي وينفري :D


سلامون عليكي

شفـقــة و إحســــان يقول...

سيدى يا سيدى بقولك ايه سيبك منهم والله انتى احسن منهم

M A K I يقول...

Appy

أنا عارفة الكلام ده كله

بس صدقونى التركيز صعب أوي ف مصر...

يعنى لو بنيت طوبة فى السور هتلاقى ميت حد يهدها....أسفة عاى اليأس ده!



نعكشة


ِشكرا على جرعة الأمل دي

و طبعا الحكومة عايزة اللي يسندهاويعنى لا يعتمد عليها بالمرة..



شفقة هانم واحسان بك


ههههههههه

طبعا احنا أحسن ألف مرة

بتديننا و
بقلبنا الطيب و دمنا الشربات

الراقـــص مع الذئـــــاب يقول...

السلام عليكم
واخييييييييييرا مي
وايه العودة الجميلة ديه
جميل جدا إننا نستفيد من تجارب الآخرين...او نحاول نقلدهم
بس احنا في عندنا قدوات احسن بكتير
تاريخنا مليان يا مي
لو كل واحد بدء بنفسه اكيد هنبقي احسن منهم بكتير
احنا مش وحشين ولا حاجة
ولا هما ملايكة
احنا اللي مش عارفين نوظف امكانيتنا وبنستسلم للي ماسكين البلد ويدوروها بمزاجهم

عودة قوية ...نتمني عدم الانقطاع

M A K I يقول...

الراقص مع الذئاب:

ازيك...شكرا جدا على الحفاوة دي :)

الفكرة اللي حبيت أوضحها من خلال البوست هى:
لو جبت بنت مصرية عندها 17 سنة وسألتها ايه أقصى أمل و طموح ليكى في الجياة؟

الرد هيكون............يا اما انها تتجوز عريس متريش أو تخلص دراستها من غير ماتشيل مواد....

فهمتوني؟

مواطن مصري يقول...

مدونة حلوة
اوي
انا بحب دكتور فل
و الله الراجل دة دماخ و تمام
شفتلة حلقة
قفش فيها نصابين بيجمعوا تبرعات باسمة بجد الراجل دة دماخ اخر حاجة لو تعرفي هو بيجي امتى قولي عشان نسيت مواعيدة و نفسي يعملو برنامج زيو في مصر
او هو يجي مصر و يشوف المشاكل اكيدهيتعقد و يجيلو احباط و مش بعيد ينتحر

انما ل الاخت اوبرا الست دي عظيمة و باحترمها الاول
عشان عانت كثير جدا من اضهاط و محاولة اغتصاب الي اشهر مذيعة في التلفزيون بتاع امريكا

M A K I يقول...

مواطن مصري


الحمد لله ان المدونة نالت الاعجاب


أنا كمان بحب الكتور فل...بس أوبلاا دمها تقيل على قلبى شوية...تصور..


بصراحة أنا مش متتبعة المواعيد بتاعة البرامج...اعذرني

ادم المصرى يقول...

بوست رائع بجد والمدونه جميله تقبلى مرورى وتحياتى لكى وهلف وهرجع

M A K I يقول...

آدم المصري:

متشكرة جدا جدا

و مستنياك تنور المدونة على طول..

blue-wave يقول...

دا للأسف صحيح لكن صدقينى بايدينا نقدر نغير دا
تحياتى

M A K I يقول...

blue-wave:

عندك حق , بس امتى امتى امتى؟؟

ربنا يدينا طوة العمر و نشوف بلادنا حاجة كبيرة بايدينا احنا يا رب!