غزة....سامحينا

لسه حالا متابعة جلسة مجلسنا الموقر فى مناقشته لأحداث غزة الأخيرة
و زعلت جدا على الوقت اللى ضيعته فى متابعتى للجلسة التى أقل ما يقال عنها مسخرة
فالسيد فتحى سر
ور<الذى بيسر الأعادي و يضر الحبايب>
أنهى الجلسة كالعادة بقرار حاسم وهو دراسة الاقتراحات..و ابقى حلنى بقى
**
**

غزة بتصرخ , صدقونى أكاد أشعر بص
راخ يصم الآذان ولكن هل من مجيب
سامحينا يا غز
ة , سامحينا يا فلسطين و ارحمنا و سامحنا يا رب!

تعبت من كثر عد الضحايا اللى دمهم مش فى رقبة الصهاينة و بس ده كمان فى رقبة كل عربى و مسلم

أغنية دايما بتدور ف دماغى:
وين وين وين الشعب العربى وين؟ وين الملايين؟

أين الغضب الساطع يا ست فيروز؟

اللهم لا تسلط علينا من لا يخافك ولا يرحمنا يا رب العالمين
و الله أكبر فوق غدر المعتدي.

ان كان لا يسعنا الا الدعاء و هو أضعف الايمان
حاول الدخول على مواقع لنصرة غزة وفلسطين دور حاول أرجوك:

No More Ignorance

رمضان كريم..الله أكرم


كل سنة وانتم طيبين
والأمة الاسلامية و العربية كلها بخير

و ربنا يدوم علينا فرحة ومحبة و خير وبركة رمضان

و يا رب رمضان اللي جاي تكونوا حققتم كل أمانيكم و طموحاتكم و آمالكم و أحلامكم

اللي عاطل يشتغل واللي عايزة تجوز يجلها عريس

واللي عايز يشوف نهضة بلده قبل ما يموت ....ده بقى يستنى شوية........

عموما كل عام وأنتم بخير

سوسة سوسة و سياسة ساسا!

سياسة...ياااااااه والله زمان

قررت أكتب عن السياسة, قصدي البوست ده يعني...

قررت اعتزال العمل السياسي- وأقصدبالعمل السياسي هنا هو شراء جرايد المعارضة و متابعة قناة الجزيرة...و أحيانا بشوف نشرة لأخبار الساعة تسعة-, وأنا كنت قررت أعتزل السياسة لأني لقيتها فل الفل و مش محتاجة متابعة والأمن مستتب و الكورة مع بيبو, وبيبو و بشير, وبيبو والعارضة-أصلي اسماعلاوية يعني!-

والحكومة المباركة النظيفة اللى بتشف وترف (الفضايح) عاملة اللي عليها والمنتخب خد كاس أفريقيا ....و كمان بتعالج المخرج الشقى يوسف شاهين على نفقتها الخاصة ....شوفتوا الكرم!!

فلما لقيت السياسة الداخلية عال العال قلت أوسع أفقي وأدخل على السياسة الخارجية العالمية الأمريكية!!

فلقيت الوضع أكثر استقرارا,والأمن أكثر استتبابا و امريكا الله يوعدها بعريس تطوعت مشكورة و بعد محايلة انها تمسك العالم بعدما طبعته بطبعها الرهيف , و بأفلامها الكاوبوي الرومانسية الشعرية أقصد الشاعرية و العنف المبرر في مسلسلاتها , وبأبطالها الشجعان اللي بيحاربوا الجريمة ف كل مكان مش بس ف

هارلم و برونكس ده

كمان في الباطنية و صقلية....


و الرئيس الأمريكي يا حرام قبل انه يحكم العالم ويشيل على عاتقه كوكو...ب الأرض كله-اللهي يجيله انزلاق غضروفي- ....مسكين يا اخوانا الرجل ده والله جمل.. حمار شغل!

المهم بقى أتابع سياسة ليه بعد كل ده...وأنا شايفة ان السياسة في ايد مش بس أمينة ..لأ وكمان سي السيد..


علشان كده اعتزلت السياسة, ودخلت كلية الألسن اللي استفدت منها كتير..ده كفاية ان أنا عرفت اشتقاق كلمة سياسة من خلالها:

سياسة ==> ساس==> سوس==> سوسة

السوس : بقى ده اللي بيطلع من طول فترة تخزين شئ معين فيعفن و ريحته تطلع و تفوح ريحة الفساد في كل حتة و ما خفي كان أعظم..

السوسة: ده بقى جـــورج بوش و نجله اللي هو ابنه يعنى...والله أعلم أوباما أبو سمرة السكرة ده هيطلع سوسة ولا بسبوسة!!

نخش بقى على المصطلحات السياسية :


سياسة دولة : كوسة و حوسة و سوسة....تعددت التسميات و الأصل واحد!

تنمية : تسلية , لب , ممكن سوداني برده!

دعم : غم !

شوفتوا بقى الألسن فادتنى ازاي!!

عن باميلا و د/فل و أوبرا وينفري و الناس اللي مايتسموش أتحدث!!!

لست من هواة الشات.......ولكن

عقلي قرب ينفجر, كل مآجي أعمل أب لود للصورة علشان أنزلها ف توقيعي على منتدى

أجنبي للمثل اليجاه وود(فرودو ف ملك الخواتم) تنزل لينك بس من غير ما تظهر الصورة

فقلت أطلب المساعدة من أي حد جوه المنتدى , وبعت رسالة فورية من بريد المنتدى لأحد

الموجودين بطريقة عشوائية لطلب المساعدة, وبعد شوية دقايق مرت عليا كالسنين كنت

بعيد محاولات رفع الصورة خلالها بلا فائدة....وصلنى رد قصير مفيد من باميلا وهي

(وده اللي عرفته بعد كده) بنت هولندية عندها 17 سنة,فحوى الرسالة كانت لنك لموقع رفع

للصور و قالتلى جربيه... و الحمد لله نفع و رفعت الصورة و حطيتها ف التوقيع و الحمد لله

و قلت أشكر البنية على المساعدة المهولة دي....

ملحوظة: طبعا انتم عمالين تقولوا و احنا مالنا بالليلة دي والموضوع من أصله

و أنا هرد عليكم و أقول ماتستعجلوش و اصبروا و كملوا قراية وانتم تعرفوا

أصل باميلا دي بقى كانت لطيفة و ودودة جدا معايا و ساعدتني(وده شئ نادر جدا بالنسبة للأوروبيين

المتحفظين و اللامبالين و الباردين غالبا) و بعتت رد على رسالة الشكر و قالتلى فيما معناه : لا شكر على واجب و لو عوزتي أي حاجة تانية أنا تحت أمرك...

المهم بعد كده لما ظبطت التوقيع وكتبت تحته كلمتين ايطالي كده لزوم الفشخرة يعني لقيت رسالة من باميلا

بتسألنب فيها ان كنت يعني (ولا مؤاخذة) ايطالية وطلبت الايميل بتاع الماسنجر عشان نتكلم شوية ايطالي

أصلها بتتعلم ايطالي و عايزة تمارس اللغة يعني...

المهم اديتها الايميل مكرهة بكرمي الحاتمي الشهير و بالجميل يتاعها , و اتكلمنا على الماسنجر ووضحتلها

اني مش ايطالية (لا قدر الله) بس بتكلم ايطالي لأني درسته بروفشنال في الكلية...

باميلا ما صدقتش ف البداية ان فيه كلية لتعليم اللغات الحديثة يعني يا ريت حتى اللغات المنقرضة أو الميتة

لمدة أربع سنين عشان الواحد يتعلم فيها لغة أو اتنين بالكتير و لمدة كبيرة يعنى أربع سنين بحالهم

و قالتلي أنا لسه ف الهاي سكول (الثانوية العامة عندنا) و بتكلم ...وراحت رصالي كذا لغة

و صلوا اخمس أو ست لغات...

طبعا بلعت كسفتي أنا اللي كنت كل أشوية أرطن بالايطالي و أقول يا أرض انهدي ماعليكي قدي

و كمان الانجليزي بتاعي مش ولا بد يعني و آل ايه كنت بفكر أروح أمثل ف هوليوود بالعنجليزي

بتاعي يا مرسي(هههههههه)..

المهم باميلا حبيبة قلبي سألتني(و بدأ الغيث ينهمر) وانتي بقى بتشتغلي ايه بالألسن دي؟؟

رديت عليها بعزة و شموخ: أنا ما بشتغلش ...(احم) أنا بدور على شغل لسه..

المهم بقى أنا قلت خير وسيلة للدفاع هي الهجوم و رميت الكورة ف ملعبها و سألتها:

انتي عايزة تطلعي ايه ؟؟

قالتلي: عايزة أبقى دكتورة نفساوية زي الدكتور فل كده تمام॥

و بعد المجاملات و عبارات الوداع وباي و تشاو وكده

قعدت أفكر...ياااه هو الهوة سحيقة كده, والمسافة بعيدة بينا و بينهم,

هما ف ناطحات السحاب و احنا جتى ماحصلناش البدروم......

أنا البنت المصرية اللي بتدور على حتى انها تكون مدرسة روضة بالألسن بتاعتها

و يا ريت حتى عارفة أوصل لكده...!!

و باميلا البنت الهولندية ذات ال17 عام اللي بتتكلم 5 لغات بطلاقة و اللي عايزة تبقى

زي الدكتور فل...بشهرته و نجاحه و ثروته....

احنا اللي أحلامنا بسيطة و صغيرة(و كمان مستكترينها علينا اللي مايتسموش)...

احنا اللي في ناس كتير فى بلدنا بتحلم برغيف العيش...

و هما أحلامهم كبيرة و عظيمة و غالبا بتتحقق...

لا أحقد على الغربيين بأمانة شديدة, لأنهم ناس بتشتغل و بتحقق أحلامها..

لكنى بحقد و بوجه شحنة الكراهية اللي جوايا من الزبالة و التلوث والفقر

و الجهل...و غيره للي بيذبحونا بالحاجات دي ...

العيب مش على السكينة العيب على اللى بيقتل بيها

الناس اللي ما يتسموش دول حاطين ف دماغهم انهم عملوا الللي

عليهم و زيادة ناحيتنا بدليل ان معدل الأعمار ارتفع ف مصر...

و ايه فايدة العمر الطويل في فقر و ذل و نكد أزلى(و كمان أذلي)

ده حتى أبسط حقوقنا مش لاقينها ( رغيف العيش)....يبقى عملتوا ايه يا بناة

نهضة مصر, اللهم لو كانت نهضة تعني في قواميس هؤلاء : وكسة أو عار!!

أنا بقى قررت اني أحلم , و أعيش حلمي ولو ف خيالى و بس...

أنا بقة عايزة أبقى زي.... أوبرا وينفري..

و ان شاالله ماحد حوش..

كراكيب 3ف1

بسم الله الرحمن الرحيم
لم أقصد أن تطول غيبتي تلك المرة.....
و لم أشأ الكتابة بالفصحى أيضا , إذا وبلا مقدمات ممطوطة
فلندخل في صلب الموضوع :
***************
طبعا احساسى بالوقت ذبل , عشان كده كل مرة
أفاجأ إن الأيام دي كلها مرت من تاريخ آخر تدوينة
طبعا أنا عارفة برده إن الجماهير الغفيرة_ و مشوها عشان خاطري_
مش قادرة تعيش من غير ما تقرا تدويناتى , بس معلش
هحاول متأخر ش للدرجة دي بعد كده...
الله يخرب بيت الكسل!!
كان عندي كذا فكرة عشان أكتب عنها ف المدونة بس كل ماتجيلى فكرة تحصل حاجة أهم فأقرر أكتب عنها و هكذا يحصل حاجة أهم وأهم , فاتكركبت كذا فكرة فوق بعضها , و فقد الحدث أهميته تدريجيا
و بالتالي الفكرة بقت بايتة
بس برده هاستعرض الأفكار دي كلها
عشان الكركبة تخف , وعشان الكلمتين اللي محبوسين
ف زوري مايخنقونيش...
***
أولا:




فلسطــــــــــــــــين
--------------------
اللي بيحصل ف فلسطين , من غير مقالات و مواضيع انشا
وكلام كتيييييير بينم عن جهل و تخلف حاااد_مني طبعا_
فالوضع أصبح فوق مستوى مصمصة الشفاه بحسرة وألم
سرعان ما يسيحوا ويتنسوا في خضم بلوتنا وخيبتنا
القوية التقيلة جداااااا
من الآخر يا ريت نبطل نحط راسنا في الرمل ذي النعام
ونفكر وننفذ مش نفكر وننسى!!!
****
ثانيا:






شاكيــــــــــــــــرا
---------------------
خبر قريته من فترة قريبة عن المغنية ........._سيبتلك حرية اختيار الصفة المناسبة حسب وجهة نظرك_ الكولومبية من أصل لبناني
"شاكيرا" في مجلة تبع الحكومة , بيستنكر_ من شاكيرا مش من الحكومة طبعا_قيامها بجولة غنائية لاسرائيل
لا تعليق غير:
اللي بيته من زجاج_و تقال أحيانا(كزاز) و (كويز)_مايحدفش شاكيرا بالطوب...والحدق يركز ويفهم بقى!!
*****
ثالثا:



منتخب مصر الكروي
------------------------
مش هسميه اعجاز ولا إنجاز لأنه وان كان عمل رائع يستحق الإشادة
ولكنه لا يستحق المبالغة..
وهو فوز منتخبنا الوطني المصري بكأس أفريقيا
متغلبا على كافة حيوانات أدغال أفريقيا(أو حديقة حيوانها بقى)
اللي عايزة أقوله وأختم بيه هو إن فرحتنا الكبيرة دي مش عشان
كسبنا الكاس أكشن تاني مرة على التوالي
لكن عشان الروح والمثابرة والرجولة اللي شفناها و هزتنا كلنا
إحنا لعبنا بجد... امتى بقى ف الجد نلعب كويس؟!

العنوان بالأسفل


تنويه: متأسفة جدا على تأخري في كتابة بوست جديد.... ولكن الأسباب كتيرة منها ما هو خارجا عن ارادتى , ومنها ما هو بارادتى الحرة!!!!
............................
أيام كثيرة مرت ولم أشعر بها, الا عندما نظرت نظرة عابرة على التقويم المعلق على الحائط , فقرأت بخط عريض
عام 2008
يالله........ الأيام كأوراق شجرة فى الخريف , تتساقط ورقة تلو الأخرى , فتصبح الشجرة صلعاء تماما متجردة من كافة أوراقها ...نهر راكد هى حياتى , لا جديد يظهر فى الأفق
حتى اهتماماتى التى كانت سلواى زهدتها
وفقدت الرغبة فى متابعة أنشطتى المعتادة
فلنقل انها فترت نقوقع, فترة تشرنق
...... ولكن بلا انتظار خروج فراشة مبهجة الشكل فى النهاية
و حتى القراءة التى كنت أعتبرها شئ مقدس بالنسبة لى
أصبحت حملا ثقيلا على كاهلى , و كأن كل سطر لا بل كل كلمة لا بل كل حرف بمثابة احدى أحجار الهرم , وحتى عندما أحاول الخروج من تلك البوتقة المعقدة , بأن أعقد جلسة مع النفس و الضمير و أحيانا يحضرها عقلى الباطن
نختلف جميعا , أو يشرد عقلى , أو حتى يغيب ضميرى فى سبات عميق
فتنفض الجلسة حتى قبل أن تبدأ
فى موقف مشابه لما يحدث فى جلسات مفاوضات الموائد المستديرة , أو حتى جلسات مجلسنا الموقر
كما ترون أنا كراكب الطوف الذى فقد مجدافه
شرد طوفى فى كل مكام حاملا اياي معه للتيار الى يوجهنا كيف يشاء بلا قدرة لنا على مجرد التفكير فى الاعتراض
و تتخخبطنا رياح الحياة فى كل حدب وصوب فى كل التجاهات الا الاتجاه الصحيح
أقود سيارة _ أو فلنقل تقودنى دون أرادة منى_ الى وجهة غير معروفة مبهمة
فتجدنى أتجه لليسار تارة أو لليمين تارة أخرة
أنحرف فجأة لأجد سيارة نقل عام عملاقة نورها يلمع بوجهى كشمس أضاءت الظلام فجأة
لا أقوى على الصراخ
ليس لأننى فى صدمة ولكن لأننى فيما يشبه اللا مبالاة
فلتسمها تنبلة ان أردت
لن أفرض عليك تسميتا ما, أنت حر فى هذا الصدد
........................
و لكن ما هذه الصرخة الاحتجاجية التى أسمعها منك
ألا تفهم ما كتبته؟
ألا تجده عقلانيا؟
اذا... فلن ألومك انها و حتى لا تزعج نفسك فى التفكير العميق مجرد كلمات قد تخرج منها بمعنى ما
أو لا تخرج منها سوى بفكرة غير محببة عن صاحب تلك الكلمات
الأمر سيان طالما كونت فكرة ما فى نهاية الامر
بعكسى أنا
فأنا لم أكون أى فكرة عن أى شئ
.... ولكن قد تفيدك معرفة
أن هذه صفحة مقتطعة من مذكرات شاب عاطل
......................................
تنويه آخر: بما أننى تأخرت عن الكتابة , اذا اعتبروا ذلك البوست شخبطة لتجريب القلم الجديد

اتحجبتى....برافووو عليكى

و أنا بقلب فى قنوات التلفزيون... و صدفة كده لقيت قناة ميلودى أغانى بتذيع أغنية حلوة جدا و هادفة - على غير
العادة- , و
الأغنية اسمها "اتحجبتى برافو عليكى" للمطرب " حسام حاج" والكليب بتاع الأغنية رائع جدا و فكرته عجبتنى
الفكرة ببساطة بتصور مراحل اقتناع و ارتداء فتاة للحجاب
بصراحة بقى الأغنية فكلاتنى بصديقتى " ى" اللى خلعت الحجاب عشان تشتغل شغلانة بتتطلب خلع الحجاب
و هى و ظيفة " مضيفة جوية" و بصراحة لما "ي" خلعت الحجاب انقسمنا لقسمين: القسم الأول
قسم حانق وزعلان عشان خلعت وتخلت عن الحجاب
و قسم تانى ويمكن القسم ده أكتر من اللى قبله
و القسم ده مؤيد و متعاطف و بيبرر الموضوع بمقولة ان الوظيفة دى لقطة وما تتعوضش و تستحق التضحية
بأى كان و بعدين و على حد تعبير القسم الثانى: " الضرورات تبيح المحظورات" .... المهم
ما بين مؤيد ومعارض
لقيت نفسى بفكر, وبغض النظر عن كافة الأقاويل, هل لو أتيح ليا انى أكون مكانها , واتعرضت عليا
الوظيفة دى... هل كنت هرضى أخلع الحجاب؟؟
ولا كنت هرفض التخلى عن الحجاب و أتمسك به؟
هو برده بغض النظر عن موافقة الأهل أو رفضهم للفكرة
أنا أعتقد والله أعلم انى كنت هرفض
لأن العمل ده مش ضرورة من أساسه عشان تبيح المحظور
يعنى الواحد مش هيموت من الجوع لو ماشتغلش الشغلانة دى
و أكيد فيه فيه فرص و بدائل تانية من غير مانغضب ربنا, ولو حتى مافيش الدين
بيقول: " ومن يتق الله يجعل له مخرجا"
>>>>>>>>>>>>>>>>>>>>>>>>>>>>>>>>>>>>>