سوسة سوسة و سياسة ساسا!

سياسة...ياااااااه والله زمان

قررت أكتب عن السياسة, قصدي البوست ده يعني...

قررت اعتزال العمل السياسي- وأقصدبالعمل السياسي هنا هو شراء جرايد المعارضة و متابعة قناة الجزيرة...و أحيانا بشوف نشرة لأخبار الساعة تسعة-, وأنا كنت قررت أعتزل السياسة لأني لقيتها فل الفل و مش محتاجة متابعة والأمن مستتب و الكورة مع بيبو, وبيبو و بشير, وبيبو والعارضة-أصلي اسماعلاوية يعني!-

والحكومة المباركة النظيفة اللى بتشف وترف (الفضايح) عاملة اللي عليها والمنتخب خد كاس أفريقيا ....و كمان بتعالج المخرج الشقى يوسف شاهين على نفقتها الخاصة ....شوفتوا الكرم!!

فلما لقيت السياسة الداخلية عال العال قلت أوسع أفقي وأدخل على السياسة الخارجية العالمية الأمريكية!!

فلقيت الوضع أكثر استقرارا,والأمن أكثر استتبابا و امريكا الله يوعدها بعريس تطوعت مشكورة و بعد محايلة انها تمسك العالم بعدما طبعته بطبعها الرهيف , و بأفلامها الكاوبوي الرومانسية الشعرية أقصد الشاعرية و العنف المبرر في مسلسلاتها , وبأبطالها الشجعان اللي بيحاربوا الجريمة ف كل مكان مش بس ف

هارلم و برونكس ده

كمان في الباطنية و صقلية....


و الرئيس الأمريكي يا حرام قبل انه يحكم العالم ويشيل على عاتقه كوكو...ب الأرض كله-اللهي يجيله انزلاق غضروفي- ....مسكين يا اخوانا الرجل ده والله جمل.. حمار شغل!

المهم بقى أتابع سياسة ليه بعد كل ده...وأنا شايفة ان السياسة في ايد مش بس أمينة ..لأ وكمان سي السيد..


علشان كده اعتزلت السياسة, ودخلت كلية الألسن اللي استفدت منها كتير..ده كفاية ان أنا عرفت اشتقاق كلمة سياسة من خلالها:

سياسة ==> ساس==> سوس==> سوسة

السوس : بقى ده اللي بيطلع من طول فترة تخزين شئ معين فيعفن و ريحته تطلع و تفوح ريحة الفساد في كل حتة و ما خفي كان أعظم..

السوسة: ده بقى جـــورج بوش و نجله اللي هو ابنه يعنى...والله أعلم أوباما أبو سمرة السكرة ده هيطلع سوسة ولا بسبوسة!!

نخش بقى على المصطلحات السياسية :


سياسة دولة : كوسة و حوسة و سوسة....تعددت التسميات و الأصل واحد!

تنمية : تسلية , لب , ممكن سوداني برده!

دعم : غم !

شوفتوا بقى الألسن فادتنى ازاي!!

هناك 7 تعليقات:

كاتب مصري يقول...

تحيتي
الصراحة لم أقرأ البوست لأني الآن على عجل ولكنني سأعود حتما لأقرأه وأضع تعليقي
هذه المرة الأولى لي هنا وأحب أن أدعوك بدعوة مصحوبة بالفل والياسمين لزيارة مدونتي آملا أن لا أرد دون إجابة الدعوة ..
أنتظر زيارتك وتعليقك قريبا..أظنها ستروق لك
تحيتي
مدونتي هناhttp://kanyatklam.blogspot.com/

مـــــــــــــي يقول...

كاتب مصري:

باشكر صراحتك...

و الدعوة مقبولة :)

الراقص مع الذئاب يقول...

السلام عليكم
ازيك يا مي
ايه يا بنتي الكلام الجامد دا
تصدقي بقي ان الالسن سعات بتنفع
انا بقي للأسف الهندسة منفعتش معايا ببصلة
ولغاية دلوقتي معرفتش يعني ايه سياسة
انا اعرف السايسة ديه بتقوم بيها الام لأبنها لما يكون بيعيط ...فبتسايسه عشان يتكم ويسكت
انا غير كدا معرفش ومبتكلمش خالص

وبرضو اللي بيشتغل في السياسة علي حد معرفتي هو السايس...اللي بيغسل الجراج والعربيات اللي بتركن فيه...أو سايس الاسطبل بتاع الخيول
اوعدنا يارب....بعربية طبعاً مش بحصان

موضوع مميز وجميل يا مي
سلام

مـــــــــــــي يقول...

يا سلام أنت متأكد انك هندسة مش ألسن!!


بجد انت عرفت السياسة أحسن منى


نورتني بجد

blue-wave يقول...

ههههههههههههههه
لأ حلو البوست بجد
بس جرئ جداااااااا
ربنا يستر عليكى يا ميوشه

مـــــــــــــي يقول...

Blue-Wave

جرئ دي مشتقة من جور ولا جرة؟!

ههههه عموما ربنا يستر, و نورت المدونة

wohnungsräumung يقول...

موضوع مميز جدا .. شكرا لكم
wohnungsräumung wien
wohnungsräumung wien